Znatiželjna koala ušla u kuću i udobno se smjestila – na novogodišnju jelku

Znatiželjna koala ušunjala se u kuću jedne Australijanke i udobno smjestila na božićnu jelku iznenadivši ženu kada je po povratku s posla ugledala neplanirani ukras.

Amanda MekKormik iz doline Koromandel u blizini Adelejda na jugu Australije pozvala je udruženje za spasavanje koala jer simpatična životinja u stvarnosti ima duge nokte i oštre zube, prenose mediji.

https://www.facebook.com/1300Koalaz/posts/714469192808655

„Večeras smo primili poziv. Naša službenica u početku je mislila da se radi o šali“, napisalo je udruženje na Fejsbuku.

„Ali, koala željna božićnog raspoloženja ušunjala se u kuću i odlučila je da bude ukrasom na jelki“, dodaju.

Di Hern-Elon iz udruženja „1300Koalaz“ kazala je da nije rijetkost da koale uđu u domove, ali se to ne događa  svaki dan.

„Koala je zdrava mlada ženka i puštena je na slobodu u blizini kuće na području koje predstavlja odlično stanište za tu životinju“, dodala je.

Koale su najpopularnije australijske životinje ali njihove su populacije ugrožene uticajem ljudi – požarima, fragmentiranjem staništa, napadima pasa i stradanjem pod točkovima automobila.