Blažić: Potpredsjednik Vlade ili zamjenik premijera stvar termina, nezakonito smanjenje broja ministarstava

 Blažić: Potpredsjednik Vlade ili zamjenik premijera stvar termina, nezakonito smanjenje broja ministarstava

foto pr centar

10:01 10:01Add CommentPolitika

Blažić: Potpredsjednik Vlade ili zamjenik premijera stvar termina, nezakonito smanjenje broja ministarstava

10:01 10:01Izvor: CdM Blažić

Potpredsjednik Vlade ili zamjenik premijera? Ovo pitanje je otvoreno nakon što je mandatar Zdravko Krivokapić izjavio da će u njegovoj Vladi, ukoliko je sastavi, potpredsjednik odnosno njegov zamjenik biti lider Građanskog pokreta URA Dritan Abazović. Ustav Crne Gore članom 102 propisuje: “Vladu čine predsjednik, jedan ili više potpredsjednika i ministri”. Profesor Đorđije Blažić za CdM objašnjava ovu pravnu nedoumicu i kaže da Krivokapić može da ima potpredsjednika ili zamjenika, jer ne postoji zakon o Vladi kojim bi to pitanje bilo jasno regulisano. Za Blažića je zabrinjavajuće to što je mandatar smanjio broja ministarstva, i kategorično tvrdi da to ne može biti urađeno bez donošenja zakona o ministarstvima, te da bi zbog toga nova Vlada bila nelegitimna.

“Zamjenik ili potpredsjednik Vlade je stvar termina, ali je u suštini ista stvar. To pitanje nije uređeno, jer mi nemamo ni zakon o Vladi. 1991. godine smo imali Zakon o Vladi i Zakon o ministarstvima i Zakon o državnoj upravi po kojima su osnivana ministarstva i organi državne uprave. Danas nemamo zakon o Skupštini, Vladi, zakon o organizovanju ministarstava. Vlada je postala samoregulatorno tijelo, sama sebe uređuje. Imamo Uredbu o Vladi. Ali Uredba je akt kojom se izvršava zakon. A koji zakon izvršavate vi?”, naglašava on.

Profesor Blažić napominje da pitanje potpredsjednika ili zamjenika treba da riješi zakon o Vladi ili zakon o državnoj upravi. Zakon o državnoj upravi uređuje ministarstva. Zakon o Vladi treba da uredi pitanje potpredsjednika. A potpredsjednik ili zamjenik, zavisi kako ćete ga zvati.

“U principu, tu se radi o nečem drugom. Zamjenik, po vokaciji, zamjenjuje predsjednika Vlade, dok je potpredsjednik neko ko je tu, koji nema izričitu vokaciju, makar ne jezičku da ga zamjenjuje, ali po ovlašćenju ili zakonu može da ga zamjenjuje. Kada je počela priča da mandatar nema potpredsjednika, reagovao sam javno rekavši da mora da ga ima. A što će biti ako se mandatar razboli? Hoće li Vlada da stane? Ustav ne reguliše ovo pitanje. Ovo su stvari koje moraju da se regulišu zakonima, a mi nemamo zakone”, upozorava Blažić.

Nema pravnog osnova za smanjenje broja ministarstava

Govoreći o spajanju ministarstava, Blažić kaže da nema logike spojiti Ministarstvo finansija sa Ministarstvom rada i socijalnog staranja.

Nejasno mu i spajanje prosvjete, nauke, kulture i sporta.

“Prosvjetu i nauku i nekako spojiti. Ali, tu dodati resor kulture, to nema smisla”, ističe on.

Napominje da je ovo nastavak priče koja je i dosada bila.

“Formiraju se nelegitimne i nelegalne institucije i dalje. Ako su to promjene, onda to neka pričaju nekome drugome. Nemate zakonskog osnova da se ovako formiraju ministarstva. Ja sam već rekao nakon izbora, ako hoćete da je formirate možete, ali samo po postojećoj Uredbi sa 18 ministarstava. Drugačije, ne možete, nemate pravni osnov za formiranje. Ako hoćete 12 ministarstava, onda promijenite Uredbu. Ali, Uredbu ne mogu da promijene nikako jer stara vlast to neće da radi. Ako oni to neće, mora se ići u Skupštinu. Zakon o ministarstvima i organima uprave, definišite ministarstva i onda na Skupštini predložite ministre. Na ovaj sadašnji način ne može biti formirana Vlada jer ne postoji pravni osnov”, kaže on.

Dakle, da biste nešto odlučili morate imati ovlašćenja da to odlučite.

“Uredbu donosi Vlada. Na osnovu čega mandatar predlaže ove ministre. Nema pravnog osnova za to. Dakle, da bi se smanjio broj resora mora se donijeti zakon o ministarstvima i organima uprave”, jasan je Blažić.

Mandatar Zdravko Krivokapić ni dva i po mjeseca nakon pobjede trojne koalicije na parlamentarnim izborima, iako je najavljivao da će to učiniti najkasnije do polovine novembra, nije uspio da sastavi vladu. Jedino što sada sa sigurnošću zna je da će ukoliko formira vladu njen potpredsjednik, odnosno njegov zamjenik biti lider GP URA Dritan Abazović.

Sjednica Skupštine na kojoj će se glasati o novoj vladi zakazana je za 2. decembar. Predsjednik parlamenta Aleksa Bečić zadužio je mandatara da najkasnije tri dana prije zasijedanja Skupštine na kojoj će se raspravljati o sastavu nove vlade dostavi predlog kandidata za ministre, kao i program rada buduće vlade.

Avatar

Portal Podgorica

Pročitajte još

Leave a Reply

Pravila Komentarisanja
Uslovi Korišćenja